期尾報告：家族序大訪談
一、 受訪者基本資料：
這擺我訪問的人是阮阿祖，伊的名叫做楊能通，佇明治四十三（1910）年九月十六生，歷經日治時期、國民政府嚴控時期、現今自由化的台灣，阿祖今年已經一百零五歲矣。
伊出生的所在是佇台南大內，彼時陣in厝真散赤，所以伊無去學校讀冊，彼陣嘛著是日本政府統治的時代，但是阿祖無讀冊所以看無日語，毋過聽有、小可會曉講，大漢了後伊才捌一寡仔字，遐嘛是序小共伊教的。
彼時陣阿祖無當過兵，應該是講政府會調派人去做代誌，著親像是義務勞動，你袂使干焦做工課、顧厝爾爾，政府分配予你的勞務著愛去做，袂使無去做咧。
阿祖佇伊28歲的時陣和查某祖楊廖氣結婚，查某祖伊是予人認養的查囝，後來有人介紹，伊著嫁予阮阿祖。in有五个囝仔，我的阿公著排第2个後生。
阮阿祖以早是砂石工人，後來著轉去厝裡種田啊！伊對小漢著攏蹛佇台南，晚年才和後生蹛佇高雄，這馬閣轉來和查某囝蹛佇台南。
二、 訪談內容：
問：阿祖你有幾个兄弟姊妹啊？
阿祖：我會記得我敢若有4个兄弟，有兩个兄弟著去予日本政府徵招去南洋做兵矣，彼時陣敢若咧戰爭吧，後來有一个攏無轉來，逐家攏伊講戰死啊，啊阮著毋知影伊的下落，我對伊無真深的印象啦！啊另外一个有轉來啦，但是身體無好，有受傷著對啊，後來嘛過身矣。逐家攏咧講若去做日本兵去戰爭，攏嘛袂轉來，若轉來的著是受傷。唉！攏叫台灣人去頭前予人打矣啦！
問：阿祖以早捌做過砂石工人，彼是咧做啥物矣？
阿祖：遐那有啥，著去做工啊…去溪邊挖砂石，彼時陣人攏一直挖，人矣叫咱著去，無叫無去著無錢通賺，咱挖偌濟著有偌濟錢，哪挖傷少著領甲少錢爾爾。
阿公：彼當陣無咧管啥物環境生態的啦，人著一直挖砂石，毋知影遐對溪仔無好。恁阿祖伊後來嘛是轉來厝內做穡。
問：恁蹛佇台南大內，有經歷啥物重大的淹大水、地動，抑是有參加社會抗爭無？
阿公：有啦，我會記持我佇善化做兵無佇大內，彼時陣有一擺地動，咱舊厝彼邊攏倒矣，恁阿祖in攏佇內底咧睏，驚一下in著走出來。
阿祖：厝攏倒矣，隔壁攏嘛是，搖就久的，逐家驚甲袂死啊！
問：啊有參加社會抗爭無?
阿祖：無啦，做田人對遐毋捌啦！
阿公：阮攏是後來才知影的啦，雖然佇台灣發生的，敢若佮阮無關安呢的款。
問：彼時陣戰爭隨時攏有可能打來，恁攏做啥物準備咧？
阿祖：真久以前的代誌矣…。若飛行機飛來，著會有廣播一直喊，阮著緊去覕的，飛行機走啊，阮著閣出來做工課。阮著覕佇山頂，無著是飛機場。
問：阿祖歷經日治時期、國民政府嚴控時期，一直到今仔日，你感覺這个政府統治台灣有啥物無共款？
阿祖：著攏予人一直控制啦…我小漢時佇日本時代，彼陣政府管甲真嚴，親像講哪有一个庄頭內有賊仔，謼！全庄攏不得安寧矣，日本警察絕對共庄頭翻到庄尾，一定會共賊仔伊掠出來，而且哪準講你袂擔罪講你犯的，你閣愛共警察說明你犯案的過程。反正攏嘛管甲足嚴矣。啊著無啥啦…。
阿公：哪有無啥，恁阿祖攏嘛一直怨講國民政府來台灣偌夭壽，貪汙、無講理、食人民夠夠…。
阿祖：in著傷超過啊，講彼聽無的國語，敢若對大陸來攏真高尚，阮講台語in講聽無，著講台語無好，愛學國語啥物的，啊講彼的氣啦。像日本統治的時陣，雖然真嚴，無in嘛有較濟建設，做代誌嘛較有咧講理，啊〜莫講仔、莫講仔…。
三、 訪談心得
這擺的期尾報告，予我了解真濟我所毋知影的長輩，佇逐家開講、話仙時，我煞聽了真濟精彩的故事，in的過去原來是這呢予我著驚矣！我選擇我的阿祖來訪談，因為我感覺這馬已經是人瑞的伊，已經一百偌歲矣，經歷遮濟年代，應該會使講出真濟故事，雖然伊的表達閣真清楚，但是年紀大啊，記持卡無遐呢好，有的是阿公和媽媽說明以早in聽阿祖講的，所以閣講予我聽的。
重要的是，因為以早較散赤的做田人，日頭一出來著去做穡矣，天暗著轉去厝歇睏，根本無知影頂面的政府咧做啥物，所以阿祖和阿公著講啥物政治抗爭啦、社會運動啦…頂頂，in攏無了解，攏是後來經過真久才聽細小咧講抑是新聞咧播，阿祖講：「做穡著袂赴矣，那有時間去啥物運動抗爭，遐阮毋捌啦！」
「政治」這个名詞影響台灣真深，嘛影響真濟台灣人，政治著是一群人咧操作，下面的百姓毋知情矣著予人創治，所以才有日本時代、國民政府時代，遮的政權無一定是人民感覺正統的，雖然我的阿祖經歷遮濟政權替換時代，毋過對一个小小的百姓來講，生活佮遐的無啥物關聯，所以嘛無經過啥物較嚴重的歷史事件，但是唯一的關聯大概的佇政權強力逼人民做代誌、付出勞力和時間的時陣吧！
阿祖講比起國民政府時代，伊閣較願意予日本仔管理。
阿祖：「親像做代誌來講，日本政府一定是管足嚴，袂做啥物、袂做偌久、安怎做，一定安排好好。」
阿公：「過程嘛袂有啥物頭工減料，像咧曾文水庫，遐建設了偌勇固咧，那有親像今馬的建商，會使共成本減偌濟著減偌濟，人日本仔做代誌攏有用心啦。」
雖然我無政治色彩，毋過聽長輩咧講，感覺國民政府真害，人講雖然日本時代足嚴矣，算起來對台灣嘛管了真好。我是感覺頂頭的政府袂做甲予每一个百姓攏滿意是毋可能矣，但是哪會使做一寡仔好政策予人民有較好的生活水準，安呢毋才會於國家閣較進步！雖然我無法度體會阿祖、阿公in小漢時的生活背景，訪談嘛是ㄧ種和厝內底的人開講的方式，但是經過了解，我發現我對in閣較親啊！佇這當中閣會使做伙回憶長輩的歷史故事！
留言列表
